Greinasafn fyrir flokkinn: Fréttir

Úrslit landskeppninnar og ólympíuliðið 2017

Árleg landskeppni í eðlisfræði fór fram 11. og 12. mars síðastliðinn. Til hennar var boðið 14 framhaldsskólanemum; 7 hæstu úr undankeppninni sem fór fram 14. febrúar, og 7 næstu sem eru nógu ungir til að fá að taka þátt í ólympíukeppninni sem haldin verður  16.-24. júlí í Yogyakarta, Indónesíu.

Landskeppnin hefur enda þetta tvíþætta hlutverk, að hvetja ungt fólk til að skara framúr í lausnum eðlisfræðilegra verkefna, og að velja fimm manna landslið til að fara sem fulltrúar Íslands á ólympíukeppnina. Keppnin reynir á færni keppenda til að leysa úr hvoru tveggja fræðilegum sem og verklegum þrautum.

Það var fríður flokkur duglegs ungs fólks sem mætti í húsnæði Háskóla Íslands tvo helgarmorgna í mars og spreytti sig á níðþungum verkefnum. Hæst urðu að rauninni lokinni:

  1. Sindri Magnússon, MR
  2. Atli Fannar Franklín, MA
  3. Erla Sigríður Sigurðardóttir, MA
  4. Garðar Sigurðarson, MR
  5. Anton Richter, MR

Lesa áfram Úrslit landskeppninnar og ólympíuliðið 2017

Eðlisfræði á Íslandi 2017 lokið

Ráðstefna Eðlisfræðifélags Íslands, Eðlisfræði á Íslandi, fór fram 8. apríl 2017 í Háskólanum í Reykjavík. Þetta var annað árið í röð sem ráðstefnan var haldin eftir að hún var endurvakin eftir nokkurt hlé.

Líkt og í fyrra komu fyrirlesarar af ýmsum sviðum. Egill Skúlason lýsti útreikningum byggðum á fræðilegum líkönum sem teymið hans við HÍ notar til að hanna efnahvata sem gera þeim kleift að rafgreina áburð og eldsneyti úr vantslausnum. Hanna Blanck lýsti skjálftamælingum IMAGE verkefnisins og kynnti áhugaverðar tilraunir þeirra með notkun ljósleiðara til að mæla jarðskjálfta.

Gunnar Gunnarsson lauk svo morgunlotunni á því að lýsa jarðhitabúskap Hellisheiðarvirkjunar og því hvernig eðli jarðhitasvæði krefst þess í raun að ráðast þarf hægt í slíkar virkjanir þar sem óvissan um raunverulegt magn varma er svo mikil. Hún verður ekki minnkuð nema með mælingum úr borholum.

Ráðstefnugestir fengu hádegismat í boði félagsins og gafst þá góður tími til spjalls um margvísleg málefni en markmið ráðstefnunnar er ekki síst að stuðla að tengslamyndun og kynna eðlisfræðinga úr misjöfnum geirum hvor fyrir öðrum.

Eftir mat var haldið á vit hins smásæja og risastóra. Ágúst Valfells kynnti rannsóknir þeirra Andreis Manolescu á sviðsröfun. Guðlaugur Jóhannesson fór yfir þær aðferðir sem notaðar eru til greininga fjarreikistjarna og hvaða upplýsingar þær geta gefið okkur (spoiler: við vitum ekki hvernig þær líta út), og Gunnlaugur Björnsson fjallaði um samspil sólvinds og segulsviðsins; hvað ræður staðsetningu norðurljósanna, áhrif sólvindsins á lífið á jörðinni og segulsviðsmælingarnar í Leiruvogi sem hann hefur seð um.

Eftir kaffi og gott spjall lauk ráðstefnunni á kennslufræðilegum nótum með erindum frá kennurum frá leikskólastigi og upp á framhaldsskólastig.

Í öfugri aldursröð nemenda, þó. Viðar Ágústsson reið á vaðið og kynnti vendikennslu sem hann hefur innleitt í námskeið sem hann kennir, og kvað það vera merkilegustu nýjung sem hann hefði kynnst á um 40 ára ferli sínum. Jens Karl Ísfjörð mælti fyrir mikilvægi verklegra æfinga sem áhugavaka og hvata. Án þeirra á sér enda ekki mikið nám stað.

María Sophusdóttir sagði frá nálgun sinni á náttúrufræðimenntun sem hún hefur nefnt Hugur og hönd sem íslenskun á Hands-on, minds-on nálguninni. Aðferðin leggur áherslu á að samþætta verklegar æfingar samræðu um viðfangsefnið og skila nemendur verkefnum af sér á formi skýrslu eða kynningar. Sigurlaug Vigdís Einarsdóttir lýsti svo vísindaleikjum sem hún vann með leikskólanemendum þar sem nám er nálgast úr leik. Hún byggði á vísindaleikjum Hauks Arasonar og bætti efnafræðileikjum við sem hluti af meistaranámi sínu.

Að loknum umræðum var ráðstefnunni slitið. Það er von félagsins og undirbúningsnefndar ráðstefnunnar að hún verði nú að árlegum viðburði á ný.

Eðlisfræði á Íslandi 2016

Laugardaginn 19. mars stóð Eðlisfræðifélag Íslands fyrir ráðstefnunni Eðlisfræði á Íslandi 2016. Ráðstefnan var endurvakin eftir rúmlega áratugs hlé og áherslan sett á störf eðlisfræðinga utan háskólasamfélagsins. Átta fyrirlesarar fluttu erindi um kennslu, nýsköpun, umhverfis- og heilbrigðismálum.

Vefsíða Eðlisfræðifélagsins

Eftir langa mæðu hefur vefsíða Eðlisfræðifélags Íslands loksins litið dagsins ljóss á ný. Hér munu birtast fréttir af starfi félagsins ásamt upplýsingum um félagið.

Félagið heldur árlega aðalfund og óreglulega smærri fræðslufundi. Félagið kemur einnig að eðlisfræðikeppni framhaldsskólanema og veitir styrki fyrir framúrskarandi árangur háskólanýnema í eðlisfræði. Í vor verður svo haldin ráðstefna Eðlisfræðifélagsins þar sem eðlisfræðingar úr hinum ýmsu geirum kynna starf sitt.

Aðalfundur Eðlisfræðifélags Íslands 2010

Hefðbundin fundarstörf

Eðlisfræðifélag Íslands hélt aðalfund sinn fyrir árið 2010 þann 13. apríl 2011. Tækifærið var því notað til að halda aðeins upp á 100 ára afmæli uppgötvunar ofurleiðni, en það átti sér stað þann 8. apríl 1911.

Hefðbundin fundarstörf tóku ekki langan tíma. Formaðurinn, Sveinn Ólafsson, og gjaldkerinn, Jón Hálfdánarson, eiga ár eftir af kjörtímabili sínu en hinir þrír stjórnarmeðlimirnir, ritarinn Guðrún Sævarsdóttir og meðstjórnendurnir Ari Ólafsson og Bergþór Hauksson voru kosnir til tveggja ára í viðbót.

Hvatningarverðlaun, Raust og umræður

Félagið veitir hvatningarverðlaun fyrir bestan námsárangur í eðlisfræði á fyrsta ári í Háskóla Íslands og Háskólann í Reykjavík. Þau hlutu að þessu sinni Ögmundur Eiríksson, stærðfræðinemi við HÍ og Guðmundur Viktorsson, nemi við Háskólann í Reykjavík. Ari Ólafsson sagði þá lauslega frá málum varðandi útgáfu Raustar, tímarits um raunvísindi og stærðfræði. Félagsgjöld voru loks lítillega hækkuð og upp spruttu nokkar umræður um menntamál.

Véstéinn Rúni Eiríksson bryddaði upp á því að gera þyrfti skýrari kröfur eða leiðbeiningar um nauðsynlega menntun úr framhaldsskólum fyrir þá sem hafa hug á námi í eðlisfræði. Almennt voru menn sammála um það. Ari Ólafsson minntist á slakt gengi sænska liðsins í Ólympíukeppninni síðasta sumar sem haldin var í Króatíu, og rakti það til þess hve langt sænskir framhaldsskólar eru komnir í þá átt sem íslenska menntakerfið stefnir í. Stjórninni var falið að fyljga þessu eftir.

Ofurleiðni

Fundi var slitið með stuttri yfirferð formanns yfir sögu uppgötvunar ofurleiðni. Að því loknu héldu fundarmenn niður í kjallara í VR-III þar sem tilraun Heike Kamerlingh Onnes þar sem ofurleiðni sást fyrst, rétt rúmum hundrað árum áður.

Myndir frá deginum

Hér eru svo myndir frá deginum.