Árleg landskeppni í eðlisfræði fór fram 11. og 12. mars síðastliðinn. Til hennar var boðið 14 framhaldsskólanemum; 7 hæstu úr undankeppninni sem fór fram 14. febrúar, og 7 næstu sem eru nógu ungir til að fá að taka þátt í ólympíukeppninni sem haldin verður 16.-24. júlí í Yogyakarta, Indónesíu.
Landskeppnin hefur enda þetta tvíþætta hlutverk, að hvetja ungt fólk til að skara framúr í lausnum eðlisfræðilegra verkefna, og að velja fimm manna landslið til að fara sem fulltrúar Íslands á ólympíukeppnina. Keppnin reynir á færni keppenda til að leysa úr hvoru tveggja fræðilegum sem og verklegum þrautum.
Það var fríður flokkur duglegs ungs fólks sem mætti í húsnæði Háskóla Íslands tvo helgarmorgna í mars og spreytti sig á níðþungum verkefnum. Hæst urðu að rauninni lokinni:
- Sindri Magnússon, MR
- Atli Fannar Franklín, MA
- Erla Sigríður Sigurðardóttir, MA
- Garðar Sigurðarson, MR
- Anton Richter, MR
Framhaldsskólanemar á Íslandi hefja hins vegar nokkuð seint nám í eðlisfræði og útskrifast (ennþá) seinna en nemendur erlendis. Á ólympíukeppninni er aldursþak sem veldur því að hluti útskriftarárganga í framhaldsskólum er of gamall til þátttöku í ólympíukeppninni og því er ekki gefið að hátt sæti á landskeppninni gefi sæti á ólympíukeppninni.
Svo standa sumir hverjir sig vel í nokkrum samskonar keppnum hérlendis og verða því að velja í hvaða landsliði þeir kjósa að taka sæti í. Þegar allt slíkt ryk hafði sest í gær var landslið Íslands í eðlisfræði árið 2017 komið á hreint. Það skipa þau:
- Brynjar Ingimarsson, MA
- Erla Sigríður Sigurðardóttir, MA
- Inga Guðrún Eiríksdóttir, MR
- Þorsteinn Elí Gíslason, VÍ
- Þórður Friðriksson, MR
Þau hefja um sex vikna þjálfun í sumarbyrjun strax og prófum lýkur sem stendur allt þar til haldið verður þvert í kringum hnöttinn til Indónesíu. Eðlisfræðifélagið óskar þeim alls hins besta á þessari vegferð.
Hér að neðan má sjá myndir frá verklega þætti landskeppninnar og tilkynningu úrslita.
